Mu gihe yitegura kwizihiza imyaka 20 amaze akora umuziki, King James ageze ku rwego rw’umuhanzi ushobora gusubiza amaso inyuma akareba urugendo rwe yishimye. Ni imyaka ibiri y’ibikorwa byatumye aba umwe mu bahanzi bafite izina rikomeye, ibikorwa byinshi ndetse n’abakunzi batigeze bamutererana.
Mu mpera z’iki cyumweru, tariki ya 1 n’iya 2 Kanama 2026, azahurira n’abakunzi b’umuziki mu bitaramo bidasanzwe byo kwizihiza imyaka 20 amaze yubaka amateka mu muziki nyarwanda.
Mu rwego rwo guha agaciro uru rugendo, twagarutse kuri bimwe mu bihe n’ibikorwa byaranze King James kugeza ubu.
Yatangiye urugendo rwe mu 2006
King James yinjiye mu muziki mu mwaka wa 2006, ubwo yashyiraga hanze indirimbo ye ya mbere yise "Ni Wowe Nkunda". Nubwo iyo ndirimbo yamufashije gutera intambwe za mbere, izina rye ryatangiye kumenyekana cyane nyuma yo gusohora indirimbo "Intinyi", yahise imushyira mu bahanzi bari kuzamuka neza muri icyo gihe.
Kuva icyo gihe, ntiyigeze asubira inyuma. Yakomeje gukora ibihangano byakunzwe ndetse agenda yubaka umwihariko we mu njyana ya R&B n’izindi njyana zitandukanye.
Yabaye umwami wa Salax Awards mu ijoro rimwe
Mu mateka y’umuziki nyarwanda, hari ijoro ritazibagirana ryabaye ku wa 31 Werurwe 2012.
Muri Salax Awards, King James yakoze amateka yo kuba umuhanzi wa mbere wegukanye ibihembo bine mu ijoro rimwe, ibintu byagaragazaga uburyo yari ageze ku rwego rwo hejuru ndetse n’uburyo ibihangano bye byari byarakunzwe n’Abanyarwanda.
Iyo ntsinzi yakomeje kumushyira mu rwego rw’abahanzi bakomeye igihugu cyari gifite muri icyo gihe.
Guma Guma yamushyize ku rwego rwo hejuru
Hashize amezi make akoze amateka muri Salax Awards, King James yongeye kwandika andi mateka.
Ku wa 28 Nyakanga 2012 yegukanye irushanwa rya Primus Guma Guma Super Star ku nshuro yaryo ya kabiri, intsinzi yamuhesheje icyubahiro gikomeye ndetse ikamwongerera abafana hirya no hino mu gihugu.
Iyo ntsinzi ni imwe mu nkingi z’ingenzi zubatse amateka ye nk’umwe mu bahanzi bakomeye u Rwanda rwagize.
Album zirindwi zigaragaza urugendo rurerure
Mu gihe hari abahanzi bamara imyaka myinshi batarashyira hanze album n’imwe, King James we amaze gusohora album zirindwi.
Ni Umugisha, Umuvandimwe, Biracyaza, Ntibisanzwe, Meze Neza, Urukundo ndetse na Ubushobozi.
Izi album zigaragaza uburyo yakomeje gukora umuziki udahagarara, buri gihe agerageza kuzana ibihangano bishya bihura n’ibihe bitandukanye.
Indirimbo zirenga 100 mu njyana zitandukanye
Kimwe mu bitandukanya King James n’abahanzi benshi ni ubushobozi bwo gukora mu njyana zitandukanye.
Mu myaka 20 amaze mu muziki, amaze gukora indirimbo zirenga 100 zirimo iza R&B, Zouk, Reggae, Afrobeat, Rumba, Gakondo n’izindi.
Uyu mwihariko watumye ashobora kugumana abakunzi b’ingeri zitandukanye ndetse akomeza guhuza ibisekuru bitandukanye binyuze mu bihangano bye.
Izina rye ryageze no muri Diaspora
King James ntiyubakiye izina rye imbere mu Rwanda gusa.
Yagiye yitabira ibitaramo byinshi by’Abanyarwanda baba mu mahanga, cyane cyane mu gikorwa cya Rwanda Day, aho yaririmbye mu editions zo mu 2013, 2014, 2015, 2016, 2017 na 2019.
Ibi byatumye umuziki we urenga imbibi z’u Rwanda, ukomeza kugera ku Banyarwanda batuye hirya no hino ku Isi.
Ntiyagarukiye ku muziki gusa
Uretse kuba ari umuhanzi, King James yaninjiye mu rwego rw’ubucuruzi n’ishoramari.
Afite Mango Super Market i Nyamirambo, ndetse anatunze Bikono Retreat, inyubako yakira abashaka kuruhukira ku nkengero z’Ikiyaga cya Kivu mu Karere ka Rutsiro.
Ibi bigaragaza ko yashatse no kubaka ejo hazaza he binyuze mu bindi bikorwa bitari umuziki.
Yagerageje no kuzana impinduka mu ikoranabuhanga
Mu Ukwakira 2021, King James yamuritse urubuga yise Zana Talent, rwari rugamije gufasha abahanzi gucururizaho ibihangano byabo.
Nubwo icyo gitekerezo kitakomeje nk’uko benshi bari babyiteze, cyagaragaje ubushake bwe bwo gushaka ibisubizo bishya byafasha uruganda rw’umuziki nyarwanda.
King James: Imyaka 20 ya muzika yubatse ku ndirimbo z’imbere mu gihugu, nta bufatanye n’abanyamahanga — ni amahitamo cyangwa amahirwe atigeze aboneka?
Nta ndirimbo yakoranye n’umuhanzi wo mu mahanga agira
Mu gihe hari abahanzi bo mu Rwanda bamaze kumenyera gukorana n’abanyamahanga mu rwego rwo kwagura isoko ryabo, King James we yihariye inkuru itandukanye: imyaka igera kuri 20 mu muziki w’umwuga, nta ndirimbo n’imwe arakorana n’umuhanzi wo hanze.
Ibi ntibivuze ko atigeze agira icyifuzo cyangwa amahirwe yo kubigerageza, ahubwo ni urugendo rwagiye ruyoborwa n’imiterere y’igihe, amahitamo ye bwite, ndetse n’isoko ry’umuziki nyarwanda ryari rimeze mu ntangiriro ze.
Mu magambo ye yagiye agarukaho mu biganiro bitandukanye n’itangazamakuru, King James agaragaza ko kuva atangira umuziki, icyerekezo cye cyari ugushinga imizi imbere mu Rwanda kurusha gutekereza hanze.
Yagize ati: “Ntabwo ari uko nigeze nanga gukorana n’umunyamahanga. Ariko ntabwo byigeze biza hafi. Natangiye nshaka gukora indirimbo nyinshi hano kurusha gutegereza kujya hanze.”
Ibi bigaragaza ko icyari imbere ye atari ugushaka gukorera ku rwego mpuzamahanga ako kanya, ahubwo yari yibanze ku kubaka izina mu isoko ryo mu gihugu.
Umuziki nk’akazi: impinduka z’imyumvire
King James avuga ko igihe yegukanye ibikombe bikomeye nko muri Primus Guma Guma Super Star, ari bwo yatangiye kubona umuziki nk’akazi gafatika gatanga inyungu, atari umuco gusa.
Iyo myumvire nayo yatumye yibanda cyane ku ndirimbo zigera ku bafana bo mu Rwanda, aho kuba yashaka imikoranire mpuzamahanga ishobora gusaba igihe, imiyoboro n’ishoramari ridasanzwe.
Impamvu zatumye atihutira gukorana n’abanyamahanga
Nubwo atigeze abihakana, King James agaragaza ko hari imbogamizi zagiye zimubuza gutera iyo ntambwe hakiri kare: Kutagira umwanya uhagije w’abahanzi bo hanze bakorana n’abari mu Rwanda icyo gihe, Uburyo imikoranire mpuzamahanga isaba gutegura igihe kirekire, Kwibanda ku bafana bo mu gihugu mbere yo gutekereza isoko mpuzamahanga, Imiterere y’umuziki nyarwanda mu bihe bya mbere, aho imikoranire n’abanyamahanga itari ikunze kugaragara.
Impinduka z’iki gihe
Uyu muhanzi ariko asanga ibintu byarahindutse. Ubu, ashimangira ko abahanzi b’iki gihe bafite amahirwe menshi yo gukorana n’abanyamahanga kurusha uko byari bimeze mbere.
Ati “Ubu biri kugenda bikunda. Abahanzi b’iki gihe bafite amahirwe yo gukorana n’abanyamahanga kurusha uko byari bimeze mu gihe cyacu.”
Umurage w’imyaka 20: guhozaho kuruta guhindura icyerekezo
Mu myaka 20 amaze mu muziki wigenga, King James amaze gushyira hanze album zigera kuri umunani, zirimo indirimbo zakunzwe cyane nk’“Ni iki utabona”, “Birandenga”, “Ndagukunda” na “Ese Uracyamukunda”.
Izi ndirimbo zatumye yandika amateka yihariye mu muziki nyarwanda, aho benshi bamufata nk’umwe mu bahanzi bagize igikundiro kidashingiye ku nkundura z’itangazamakuru, ahubwo ku ndirimbo ubwazo.
Igitaramo cy’imyaka 20 cyamaze kwandika amateka
Mbere y’uko ajya ku rubyiniro, igitaramo cyo kwizihiza imyaka 20 amaze mu muziki cyari cyamaze gukora amateka.
Amatike yacyo yashyizwe ku isoko ashira mu gihe cy’iminsi itatu gusa, ibintu byongeye kugaragaza ko King James agifite igikundiro gikomeye mu bakunzi b’umuziki nyarwanda.
Ni ikimenyetso cy’uko imyaka 20 amaze mu muziki itamugabanyirije agaciro, ahubwo yamuhesheje icyizere n’icyubahiro byubatse buhoro buhoro.
Mu rugendo rwamaze imyaka ibiri, King James ntabwo yubatse izina rye ku ndirimbo zakunzwe gusa, ahubwo yanubatse umurage uzibukwa mu muziki nyarwanda.
Yabaye umwe mu bahanzi bahindutse ishusho y’igihe cyabo, atsindira ibihembo bikomeye, ashyira hanze album nyinshi, ataramira Abanyarwanda bo hirya no hino ku Isi ndetse akomeza gushora imari no gutekereza ku iterambere ry’inganda z’umuziki.
Mu gihe yitegura guhurira n’abakunzi be mu bitaramo byo kwizihiza imyaka 20 amaze akora umuziki, nta gushidikanya ko uru ari urugendo rutari gusa urwe, ahubwo ari amateka yanditswe n’umwe mu bahanzi bagize uruhare rukomeye mu kuzamura no gukomeza kubaka umuziki nyarwanda.