ALICIA NA GERMAINE BAKOZE UMURYANGO UTEGAMIYE KURI LETA WOGUFASHA ABATISHOBOYE BAHEREYE KU BIGISENYI

Abahanzikazi Alicia na Germaine bazwi mu muziki wo kuramya no guhimbaza Imana batangije umuryango witwa ‘Ufitimana Foundation’, bagamije ibikorwa by’ubugiraneza no gufasha abatishoboye. Ku ikubitiro, basuye abarwayi bo mu Bitaro bya Gisenyi, babagenera ubufasha ndetse barabahumuriza.Abo bahanzikazi bavuga ko gushinga uyu muryango byaturutse ku gusobanukirwa n’ijambo ry’Imana rivuga ko kwizera kudafite imirimo kuba gupfuye.

Umuryango ‘Ufitimana Foundation’ ufite intero igira iti “Ngira Nkugire”, ukazajya utegura ibikorwa byo gufasha abatishoboye no gukomeza kugaragaza urukundo mu bikorwa.

Ku bufatanye na ABA Music Team n’abagiraneza batandukanye, abo bahanzikazi basuye abarwayi bo mu Bitaro bya Gisenyi, barabasengera, babaha ihumure ndetse banabashyikiriza ubufasha burimo amata, isukari, isabune, ibisuguti n’ibindi bifasha abantu mu buzima bwa buri munsi.

Alicia Ufitimana usanzwe ari umunyeshuri muri Kaminuza y’u Rwanda, mu bijyanye n’ubuganga, yavuze ko yagize igitekerezo cyo gufasha abatishoboye nyuma yo kubona ubuzima bugoye bw’abarwayi mu bitaro bitandukanye birimo n’ibyo yakoreyemo imenyerezamwuga (stage) aho bamwe baba badafite ababagemurira, abandi bakabura amafaranga yo kwishyura imiti bahawe kwa muganga.

Innocent Ufitimana, ushinzwe kureberera inyungu za Alicia na Germaine, akaba n’umubyeyi wabo, yavuze ko yakiriye neza cyane igitekerezo cy’aba bahanzikazi cyo gutangiza ibikorwa by’ubugiraneza, ashimangira ko ari intambwe igaragaza ko ubutumwa baririmba batangiye no kubushyira mu bikorwa.

Ibikorwa byabo by’ubugiraneza babitangirije i Rubavu ari na ho bakomoka, bakaba bateganya kubikomereza no mu tundi turere.

Alicia na Germaine bari hagati ya Muyoboke na Ben ni bamwe mu baririmbye muri concert ya Ben na Chance

Barasaba n’abandi bantu bose bafite umutima wo gufasha kwifatanya na bo muri uyu murimo mushya, kugira ngo ibikorwa byabo birusheho kwaguka no kugera kuri benshi bakeneye ubufasha.

Bagize bati: “Ku bifuza kwifatanya natwe, amarembo arafunguye. ‘Ngira Nkugire’, maze turangwe n’ubuntu, ubupfura, ubukristo n’urukundo.” Abifuza gushyigikira cyangwa kwifatanya n’uyu muryango kandi bashobora kubahamagara kuri +250 788 945 200.

Alicia na Germaine ni abahanzikazi bakunzwe cyane mu ndirimbo zirimo ‘Ibendera’, ‘Uriyo’, ‘Ndahiriwe’, ‘Urufatiro’, na ‘Ibanga’ baherutse gushyira hanze.