Uyu mukino wa 1/6 wabaye kuri uyu wa Gatandatu saa Sita z’ijoro kuri Hard Rock Stadium ukaba witabiriwe n'abafana barenga ibihumbi 64.
Ni umukino watunguye benshi kuko Cape Verde yarimo irakina Igikombe cy'Isi ku nshuro ya mbere, yagaragaje urwego rwo hejuru ndetse inshuro ebyiri zose ikishyura ibitego yari yatsinzwe.
Kapiteni wa Argentine, Lionel Messi, yafunguye amazamu ku munota wa 29 nyuma yo guhabwa umupira mwiza na Lisandro MartĂnez ahita yuzuza ibitego 7 muri ri rushanwa ry’uyu mwaka naho bikaba 20 muri rusange.
Mu gice cya kabiri, Cape Verde yagarutse ifite imbaraga nyinshi maze Deroy Duarte yishyura igitego ku munota wa 59, bituma amakipe yombi akomeza anganya 1-1 kugeza iminota 90 irangiye hitabazwa 30 y’inyongera.
Mu minota y'inyongera, Lisandro MartĂnez yongeye guhesha Argentine icyizere atsinda igitego cya kabiri ku munota wa 92, ariko ibyishimo byayo ntibyatinze kuko myugariro w'ibumoso Sidny Lopes Cabral yatsinze igitego cyiza cyane ku munota wa 103,bihita biba 2-2.
Ubwo byasaga n'aho umukino ushobora kugana muri penaliti, Argentine yabonye amahirwe ku mupira wari utewe na Messi muri koruneri ubundi Cristian Romero ashyiraho umutwe gusa birangira
myugariro wa Cape Verde, Diney Borges yitsinze bihita biba 3-2.
Cape Verde ntiyacitse intege kuko yongeye gusatira cyane, ndetse Sidny Lopes Cabral yabonye kufura nziza, ariko umunyezamu Emiliano MartĂnez ayikuramo, arinda intsinzi y'ikipe ye.
Nubwo yasezerewe, Cape Verde yashimwe n'abatari bake kubera uko yitwaye muri iri rushanwa. Nk'igihugu cyari cyitabiriye Igikombe cy'Isi bwa mbere kandi kiri ku mwanya wa 67 ku rutonde rwa FIFA mbere y'irushanwa, cyerekanye ko gishoboye guhangana n'ibihangange dore kivuyemo kidatsinzwe mu mikinota 90.
Nyuma yo gukomeza muri 1/8 cy'irangiza, Argentine izahura na Misiri mu mukino uteganyijwe kubera i Atlanta.
Byasabye abakinnyi ba Argentine barangajwe imbere na Messi kwiyuha akuya ngo basezerere Cape Verde
Argentine yasezereye Cape Verde bigoranye
Kari agahinda ku bakinnyi ba Cape Verde 