Amakuru yizewe InyaRwanda yamenye ni uko ku mugoroba wo kuri uyu wa Kabiri tariki 14 Nyakanga 2026, umunyamakuru uzwi nka Pizzo, washinze Max TV, ndetse na Kazungu Kaboss, umwe mu bakoresha imbuga nkoranyambaga bazwi nka 'Influencer', bahawe imbabazi na DJ Sonia.
Aba bombi bari bamaze iminsi bari mu maboko y'Urwego rw'Igihugu rw'Ubugenzacyaha (RIB), mbere y'uko DJ Sonia afata icyemezo cyo kubababarira.
Mu kiganiro yagiranye na InyaRwanda nyuma yo kurekurwa, Kazungu Kaboss yashimiye DJ Sonia ku cyemezo yafashe. Yagize ati: "Ndashimira DJ Sonia ku mbabazi yampaye."
Amakuru ari muri iyi dosiye agaragaza ko abantu bakurikiranywe muri iki kirego cya DJ Sonia bagera kuri barindwi, bivuze ko hari abandi bagikomeje gukurikiranwa n'inzego zibishinzwe.
DJ Sonia, yifashishije umunyamategeko we Me Jean Paul Ibambe, yaregeye inzego zibishinzwe abantu batandukanye abasabira gukurikiranwaho ibyaha birimo kubuza amahwemo hakoreshejwe mudasobwa cyangwa urusobe rwa mudasobwa (Cyber-stalking), gutangaza amakuru y'ibihuha ndetse n'ibindi byaha bifitanye isano no gukoresha nabi ikoranabuhanga.
Mu minsi ishize, DJ Sonia yari yashyize ubutumwa kuri konti ye ya X, ashimira Umunyamabanga Mukuru wa RIB, Colonel Pacifique Kayigamba Kabanda, ndetse n'abakozi b'uru rwego bose, avuga ko bamwakiranye ubushishozi, bakamwumva kandi bakamwizeza ko ikibazo cye kizakurikiranwa uko bikwiye.
Yanashimiye Abanyarwanda benshi bamubaye hafi nyuma yo gusangiza abantu ibibazo yavuze ko amaze imyaka ahura na byo.
Mu kiganiro aherutse kugirana na InyaRwanda, DJ Sonia yavuze ko ikibazo cyo gusebwa no guharabikwa atari icy'ubu, ahubwo ko kimaze imyaka ine, ndetse ko muri icyo gihe yakomeje kwitabaza inzego z'ubutabera.
Yavuze ko hagati ya 2023 na 2026 yatanze ibirego bitandukanye muri RIB, ariko akavuga ko atari yarabona igisubizo cyamunyuze.
Yagize ati: "Ibintu byose bagiye bamvugaho narabitangaga muri RIB. Nabonye ko bimaze gukomera, ni bwo natangiye no kubivuga ku mugaragaro kugira ngo abantu bamenye ibyo ndi kunyuramo."
Yanavuze ko hari abantu yashyikirije RIB akekwaho kugira uruhare mu kumusebya no kumuharabika, ariko kugeza ubu atari yarabona bakurikiranwa nk'uko abyifuza.
Ati: "Hari abo najyanye muri RIB, ariko sinigeze mbona bakurikiranwa. Ubu ndasaba ko ibyo birego byakurikiranwa kuko ibintu bimaze gufata indi ntera, kugeza aho banshyiraho n'ibikangisho."
DJ Sonia yavuze kandi ko abantu bakekwaho kugira uruhare muri ibyo bikorwa barenga batanu.
Yagize ati: "Kuva mu 2023, 2024, 2025 na 2026, nagiye ntanga ibirego bitatu bitandukanye. Nari narabigize ibanga, ariko ubu ndambiwe kubikora mu bwiru. Ndashaka ko abantu bamenya ko hari ibyo nari nkiri gukurikirana, n'ubwo nta cyari cyaragaragara.
DJ Sonia ni umwe mu bakobwa bake bageze ku rwego rwo kwigaragaza mu mwuga wo kuvanga imiziki (DJ) mu Rwanda, umwuga wari usanzwe ugaragaramo abagabo benshi. Kuba ari umuntu uzwi cyane byatumye amakuru amuvugwaho akwirakwira byihuse ku mbuga nkoranyambaga, ari ukuri cyangwa ibihuha.
Mu Rwanda, ibikorwa byo gusebya, guharabika cyangwa guhoza umuntu ku nkeke hifashishijwe ikoranabuhanga bihanwa n'amategeko. Itegeko Nº 60/2018 ryo gukumira no guhana ibyaha bikoreshejwe ikoranabuhanga riteganya ko umuntu uhoza undi ku nkeke cyangwa akamukurikirana akoresheje ikoranabuhanga ashobora guhanishwa igifungo kiri hagati y'amezi atandatu n'imyaka ibiri, ndetse agacibwa ihazabu iri hagati ya miliyoni imwe na miliyoni ebyiri z'amafaranga y'u Rwanda.
RIB na yo yakomeje kwibutsa abakoresha imbuga nkoranyambaga ko gukwirakwiza ibihuha, gusebya abandi cyangwa gutangaza amakuru atizewe hagamijwe gushaka ubwamamare cyangwa ababakurikira benshi bishobora kugira ingaruka zikomeye ku babikorerwa kandi bikaba bikurikiranwa n'amategeko.
Dj Sonia yahaye imbabazi abantu babiri nyuma y’iminsi yari ishize bari mu maboko y’Urwego rw’Igihugu rw’Ubugenzacyaha (RIB)