Intore TUYISENGE kuyobora umudugudu byatumye nkoraindirimbo zitandukanye

Intore Tuyisenge yari amaze igihe adashyira hanze indirimbo nshya, ariko avuga ko yagarutse afite imbaraga nshya n’umurongo wo gukoresha muzika mu gutanga ubutumwa bufasha Abanyarwanda kurushaho gusobanukirwa gahunda zigamije iterambere ry’Igihugu, by’umwihariko izikubiye muri gahunda ya NST2.

Iyi ndirimbo “Umuganda” yayigarutseho avuga ko yifuza gukomeza gutanga umusanzu we mu bukangurambaga bushishikariza abaturage kugira uruhare mu iterambere ry’Igihugu.

Yagaragaje ko mu gihe gahunda y’Igihugu ishimangira ko umuturage ari ku isonga, ari ngombwa ko abaturage bamenya ko uburenganzira bafite bujyana n’inshingano zo kugira uruhare mu kubaka Igihugu no guteza imbere imibereho yabo.

Intore Tuyisenge yabwiye InyaRwanda, ati: “Mu gihe maze mu nzego z’ibanze nyobora umwe mu Midugudu 1,155 y’Umujyi wa Kigali, nungutse byinshi bizamfasha kunoza inganzo, cyane cyane mu guhuza abaturage n’ubuyobozi mu bukangurambaga butandukanye kuri gahunda zibafasha kwiteza imbere, banabungabunga ubuzima bwabo kandi birinda icyahungabanya Umuryango Nyarwanda."

Yavuze ko Umuganda ari imwe mu nzira zo kwishakamo ibisubizo. Mu ndirimbo “Umuganda”, Intore Tuyisenge yibutsa Abanyarwanda ko Umuganda atari umwanya wo gukora imirimo y’amaboko gusa, ahubwo ko ari imwe mu gahunda zituma abaturage bahuriza hamwe imbaraga n’ubushobozi bafite, bakishakamo ibisubizo bibafitiye akamaro.

Avuga ko uruhare rwa buri wese rukenewe, bityo ko nta muntu ukwiye kwirinda kwifatanya n’abandi ku munsi w’Umuganda, kuko nubwo ushobora kumara amasaha make, ari umwanya ushobora kuvamo ibikorwa n’ibitekerezo bifitiye abaturage n’Igihugu akamaro.

Intore Tuyisenge kandi yagaragaje ko hari Umuganda ushingiye ku bumenyi, aho umuntu ashobora gukoresha ubumenyi n’umwuga afite mu gufasha abaturage, aho gukora imirimo isaba imbaraga z’umubiri gusa.

Ati: “Uretse imirimo y’amaboko, hari n’Umuganda ushingiye ku bumenyi, aho wakora Umuganda ufasha abaturage bitewe n’ubumenyi runaka ufite. Urugero, abanyamategeko bafasha abaturage kubasobanurira amategeko nyuma y’Umuganda; abize ubwubatsi bagafasha abaturage gutura neza no gukora imiyoboro y’amazi; abaganga bagafasha gusuzuma indwara zitandukanye.”

Intore Tuyisenge yanibukije ko Umuganda atari gahunda ireba abatarize cyangwa abakuze gusa, ahubwo ko buri Munyarwanda afite uruhare ashobora kuwugiramo bitewe n’ubushobozi n’ubumenyi afite.

Yasabye urubyiruko cyane cyane kumenya ko rufite inshingano mu kubaka Igihugu, ashimangira ko bidakwiye ko ababyeyi bajya mu bikorwa by’Umuganda bagasiga abana babo baryamye mu rugo.

Yagize ati: “Umuganda si uw’abatarize gusa, buri wese akora Umuganda. Urubyiruko ndarwibutsa ko ababyeyi babo badakwiye kujya ku Muganda ngo babasige baryamye, kandi ari bo mbaraga z’Igihugu zubaka.”

Intore Tuyisenge avuga ko ubumenyi n’amasomo akura mu mikoranire n’abaturage ndetse n’inshingano afite mu nzego z’ibanze ari bimwe mu bimufasha gutanga ubutumwa bwubaka binyuze mu bihangano bye.

Indirimbo “Umuganda” aje nyuma y’igihe yari amaze adasohora indirimbo nshya, aho Tuyisenge avuga ko azakomeza gukoresha muzika nk’umuyoboro wo kugeza ku Banyarwanda ubutumwa bubafasha gusobanukirwa gahunda zitandukanye zigamije iterambere ryabo n’iry’Igihugu.

Intore Tuyisenge yatangaje ko indirimbo ‘Umuganda’ ikomoka ku nshingano yahawe zo kuyobora Umugudugu

Tuyisenge yavuze ko ‘Umuganda’ ufitiye akamaro igihugu, bityo ko buri wese akwiriye kuwitabira

Tuyisenge yavuze ko yari amaze igihe adasohora indirimbo bitewe n’inshingano afite muri iki gihe