Iyi sosiyete yashishikarije uyu mwana gukomeza guteza imbere impano ye, nyuma y’amashusho yakwirakwiye ku mbuga nkoranyambaga amugaragaza acenga abandi bana, acunga neza umupira ndetse atsinda ibitego mu irushanwa ryabereye i Winter Park, muri Leta ya Florida, muri Leta Zunze Ubumwe za Amerika.
Nevada Neymar Pierre yitabiriye iri rushanwa ryateguwe na i9 Sports, aho yakinaga n’abana bamurusha imyaka igera kuri ibiri. Nubwo akiri muto, yagaragaje ubuhanga mu gucenga abo bahanganye no kubatsinda, bituma amashusho ye akwirakwira cyane ku mbuga nkoranyambaga.
Icyakora, ibyishimo by’umukino byaje kuvamo impaka, nyuma y’uko uyu mwana asimbujwe mu gihe cy’irushanwa. Umuryango we uvuga ko yakuwe mu kibuga kubera ko yakinaga neza kurusha abandi bana, ndetse akagumana umupira igihe kinini, ibintu byatumye bamwe mu babyeyi b’abana bakinaga na we binubira uburyo yakiniraga.
Nyuma y’ayo makimbirane, ku wa 24 Ukwakira 2026, Polisi yarahamagawe kugira ngo ikurikirane ikibazo cyari cyavutse hagati y’ababyeyi ba Nevada n’abateguye irushanwa. Icyakora, Polisi yasobanuye ko nta muntu yafashe cyangwa ngo ihatire uyu muryango kuva aho irushanwa ryaberaga, ahubwo ko wemeye kuhava ku bushake.
Ku ruhande rw’abateguye irushanwa, basobanuye ko impungenge zabo zitari zishingiye gusa ku buhanga bw’uyu mwana, ahubwo ko yashinjwaga gusunika abandi bana bakinanaga. Nyina wa Nevada yahakanye ibyo ashinjwa, agaragaza ko umuhungu we yari akwiye guhabwa amahirwe yo gukina nk’abandi.
Ibyabaye byakuruye impaka ku mbuga nkoranyambaga, aho bamwe bagaragaje impungenge z’uko icyemezo cyo kumusimbuza gishobora kuba cyaratewe n’ivangura rishingiye ku ibara ry’uruhu.
Gusa, kugeza ubu, nta bimenyetso byemeza ko ivangura ari ryo ryatumye uyu mwana avanwa mu irushanwa, mu gihe i9 Sports yatangaje ko iri gusuzuma ibyabaye no kuganira n’impande zabigizemo uruhare.
Mu gihe iyi nkuru ikomeje kuvugisha benshi, inkunga ya Roc Nation Sports yongeye gushyira Nevada mu biganiro by’abakurikira umupira w’amaguru, benshi bagaragaza ko umwana ufite impano akwiye guhabwa umwanya wo kuyigaragaza no kuyiteza imbere.
Kuri Nevada, ufite imyaka itatu gusa, iyi nkunga ishobora kumubera imbarutso yo gukomeza gukura akunda umupira w’amaguru, mu gihe impaka ku byabereye muri iri rushanwa zikomeje gukurura ibitekerezo bitandukanye.