Iyi Album izaba ari iya gatatu mu rugendo rwa Papa Cyangwe mu muziki, nyuma ya ‘Now or Never’ yasohoye mu 2025 ndetse n’indi mishinga yamufashije gukomeza kubaka izina rye mu muziki nyarwanda.
Papa Cyangwe yatangaje ko ‘Never Broke Again’ izajya ku isoko ku wa 28 Nzeri 2026. Ni Album avuga ko ifite umwihariko ukomeye mu rugendo rwe rw’umuziki, cyane cyane ku bijyanye n’ubutumwa, uburyo indirimbo zubatse ndetse n’abahanzi bahisemo gukorana.
Mu ndirimbo ziri kuri iyi Album harimo ‘Indyarya Gusa’ ari na yo Intro, ‘Sa’ yakoranye na Marina, ‘Kuki Wabyemeye?’, ‘Nibe Nawe’ yakoranye na Racine na Yampano, ‘Twarabikoreye’, ‘Depression’ yakoranye na Lino G, ‘Full Package’ yakoranye na Logan Joe na ‘Busy’ yakoranye na Elvin Cena.
Harimo kandi ‘Impundu’ yakoranye na Magna Romeo, ‘Sempe’ yakoranye na Mistaek, Bushali na Fox Makare, ‘Mbyifuza’ yakoranye na Hollix, White Monkey na Hervis Beatz, ndetse na ‘Imbeho Ngo Mutahe’.
Kimwe mu bintu bigaragara cyane kuri ‘Never Broke Again’ ni uburyo Papa Cyangwe yahisemo kuyubakamo ubufatanye n’abahanzi bafite imiririmbire n’imisusire itandukanye.
Kuri iyi Album, Papa Cyangwe ntabwo yagarukiye ku baraperi gusa. Yahuje injyana zitandukanye n’abahanzi batandukanye, ku buryo buri ndirimbo ishobora kuzagira umwihariko wayo bitewe n’uwo bakoranye.
Marina, Yampano, Bushali, Racine, Logan Joe, Elvin Cena, Magna Romeo, Mistaek n’abandi, bose bagaragara mu mishinga itandukanye iri kuri iyi Album.
Ibi kandi bikomeza umuco wa Papa Cyangwe wo gukorana n’abandi bahanzi, kuko mu ndirimbo ze zabanje hari izamufashije kumenyekana cyane kubera ubufatanye yagiranye n’abahanzi batandukanye.
Papa Cyangwe ni umwe mu baraperi nyarwanda bagize uruhare mu guteza imbere injyana ya Kinyatrap n’izindi njyana zigezweho mu muziki w’u Rwanda.
Yatangiye kumenyekana cyane mu gihe yari afashwa na Rocky Kimomo binyuze muri Rocky Entertainment, aho yaboneye umwanya wo kwagura ibikorwa bye no kurushaho kumenyekanisha umuziki we.
Mu ndirimbo zagiye zimufasha kubaka izina harimo ‘Kuntsutsu’ yakoranye na Juno Kizigenza, ‘Bambe’ yakoranye na Social Mula, ‘Imbeba’ yakoranye na Igor Mabano, ‘Winsetsa’ ndetse na ‘Ntabya Gang’ yakoranye na Bushali, n’izindi.
Izi ndirimbo zagiye zimugaragaza nk’umuhanzi ukunda kuvanga ubuzima busanzwe, imvugo zikoreshwa n’urubyiruko ndetse n’ibitekerezo bye ku buzima bwa buri munsi.
Mu 2025, Papa Cyangwe yashyize hanze Album ‘Now or Never’, ari na yo yabaye umushinga we wa kabiri wa Album.
Muri uwo mwaka kandi yakoze igitaramo cyo kwizihiza imyaka itanu yari amaze mu muziki. Icyo gitaramo cyabereye muri Kigali Universe, kiba kimwe mu bikorwa byagaragaje urugendo yari amaze gukora kuva atangiye umuziki.
Ubu, nyuma y’iyo myaka yo kwiyubaka no gushimangira umwanya we mu muziki, agiye kongera gusubira ku isoko afite ‘Never Broke Again’.
Iyi Album ije mu gihe Papa Cyangwe amaze kumenyekana cyane nk’umuhanzi ukunda gukorana n’abandi, cyane cyane mu guhuza abaraperi n’abaririmbyi bafite imisusire itandukanye.
Papa Cyangwe asobanura umuziki we nk’ushingiye ku buzima busanzwe bw’abantu, ku butumwa ndetse no ku marangamutima. Ni na yo mpamvu indirimbo ze zikunze gukoraho ku nkuru, ibihe n’ibibazo abantu bashobora kwisanga barimo.
‘Never Broke Again’ rero ntabwo ari Album yaje gusa kongera indirimbo ku rutonde rw’ibyo amaze gukora. Ni umushinga ahuriyemo n’abahanzi benshi, kandi ushobora gukomeza kugaragaza uko Papa Cyangwe agenda ahindura imisusire ye no kwagura umuziki we.
Ku wa 29 Nzeri 2026, abakunzi be bazamenya neza ishusho yuzuye y’uyu mushinga, ubwo indirimbo 12 zose zizaba zimaze gushyirwa ku isoko.
Papa Cyangwe yatangaje ko agiye gushyira hanze Album ye ya Gatatu yahurijeho abahanzi banyuranye
Papa Cyangwe agaragaza ko iyi Album izajya ku isoko tariki 29 Nzeri 2026